Greinasafn: Áhrif fóðurstyrks og tímalengdar innifóðrunar á vöxt lamba

Áhrif fóðurstyrks og tímalengdar innifóðrunar á vöxt lamba


Höfundur	Útgefandi	Útgáfuár	Útgáfustaður
Jóhannes Sveinbjörnsson, Emma Eyþórsdóttir, Eyjólfur Kristinn Örnólfsson	Bændasamtök Íslands	2003	Reykjavík

Rit	Árgangur	Tölublað	Bls.
Freyr	99	7	29-32

Greinina í heild sinni er að finna í pdf-skjalinu.

Inngangur

Þegar rætt er um haustbötun sláturlamba er venjulega átt við beit lamba á grænfóður og tún eftir að þau koma af úthaga. Tilgangurinn með haustbötun er að auka fallþunga lamba og bæta vaxtarlagsflokkun án þess þó að fitusöfnun verði óhófleg. Haustbötun getur líka verið liður í að lengja sláturtíð fram eftir hausti þar sem hún stuðlar að því að lömb séu lengur í sláturhæfu ástandi eftir að úthagagróður hættir að fullnægja þörfum lambanna fyrir góða næringu. Ef halda á eldi áfram eftir að veður geta farið að hamla beit verður að koma til innifóðrun. Hún er að jafnaði dýrari en beitin en hvatinn til innifóðrunar felst fyrst og fremst í hærra afurðaverði utan hefðbundins sláturtíma, svo sem í nóvember og desember. Með samþjöppun slátrunar á færri sláturhús er þörfin fyrir að færa slátrunina út fyrir hefðbundinn sláturtíma að aukast gífurlega.
Tilraunin sem hér er skýrt frá var framkvæmd á tilraunabúi RALA og LBH á Hesti haustið 2002. Markmiðið með henni var einkum að skoða árangur af innifóðrun eftir tímalengd innifóðrunar og fóðurstyrk. Notað var annars vegar eingöngu úrvals gróffóður og hins vegar sama gróffóður ásamt tiltölulega stórum kjarnfóðurskammti, eða 400 g/lamb/dag. Í báðum tilvikum fengu lömbin að éta gróffóðrið eftir að lyst. Ástæðan fyrir því að prófa svo stóran kjarnfóðurskammt er sú að á stuttum innieldistíma, einkum á þeim tíma árs er hér var reynt, gengur oft illa að fá lömb til að vaxa svo einhverju nemi. Því er hugsanlegt að réttlætanlegt geti verið að gefa stóran kjarnfóðurskammt í stuttan tíma ef það má verða til þess að ná þeim vexti er til þarf svo að lambið nái hæfilegri sláturstærð fyrir tiltekinn tíma. Þetta er gjarnan gert erlendis og þá jafnvel notaðir enn stærri kjarnfóðurskammtar en hér var gert. Aðstæður þar eru hins vegar ólíkar, kjarnfóður ódýrara en gróffóður oft lakara að gæðum en gengur og gerist. Megin spurningin hér var því sú hvort innflutt kjarnfóður væri samkeppnishæft við íslenskt úrvals gróffóður til innieldis lamba í mislangan tíma (3 eða 6 vikur) að hausti.