|
|
Mál nr. 31
Umhverfis -og jarðræktarnefnd
Framlög til landgræðsluverkefna
1. Erindi Bsb. Norður Þingeyinga
Búnaðarþing 2006 krefst þess að fjárveitingar til landbótasjóðs verði auknar, og staðið verði að fullu við fyrirheit um fjárframlög til sjóðsins.
Greinargerð: Mikið hefur vantað á að fjárveitingar til landbótasjóðs hafi verið í samræmi við áætlanir. Þingið telur nauðsynlegt að nú í aðdraganda nýs sauðfjársamnings verði fjárveitingar til verkefnisins auknar verulega. Annars er hætt við að trúverðugleiki landnýtingarþáttar gæðastýringar bíði hnekki.
2. Erindi Landssamtaka sauðfjárbænda
Búnaðarþing 2006 krefst þess að séð verði fyrir nægu fjármagni til að standa við þær landbótaáætlanir sem bændur þurfa að gera til að uppfylla kröfur um gæðastýringu.
Greinargerð: Mikil óvissa virðist vera um fjármagn til þeirra landbótaáætlana sem bændur hafa þurft að gera til að uppfylla kröfur um gæðastýringu, einkum vegna mun minni fjárveitinga til Landbótasjóðs en áætlað var. Það er með öllu óviðunandi ef sú staða kemur upp að þeir bændur sem ráðast í landbótaáætlanir vegna kvaða í síðasta sauðfjársamningi og standa við þær að sinni hálfu fá ekki tilskilin mótframlög Landgræðslunnar. Slíkt mundi setja gæðastýringuna í uppnám og skapa mikla tortryggni til landnýtingarþáttar í nýjum sauðfjársamningi.
3. Erindi búnaðarþingsfulltrúa á starfssvæði Bsb. Suðurlands
Búnaðarþing 2006 skorar á ríkisstjórn og landbúnaðarráðherra að stórauka framlög til verkefnisins "Bændur græða landið".
Greinargerð: Verkefnið Bændur græða landið byggir á samstarfi bænda og Landgræðslu ríkisins um uppgræðslu í heimalandi og afréttum. Styrkur ríkisins miðast við kaup á fyrirfram ákveðnu magni af tilbúnum áburði og einnig fá bændur fræ eftir samkomulagi við landgræðslufulltrúa sem einnig er ráðgefandi um framkvæmd uppgræðslunnar. Bændur leggja til alla sína vinnu, vélar og þekkingu í verkefninu og fullyrða má að verkefnið er víðtækasta og hagkvæmasta leið til uppgræðslu lands sem völ er á. Verkefnið stuðlar einnig að auknum áhuga og þekkingu bænda á uppgræðslu og landnýtingu og flestir bændur sem taka þátt í verkefninu eru tilbúnir að bæta við uppgræðslu sína umfram það sem nú er.
Benda má á að til landshlutabundinna skógræktarverkefna greiðir ríkið 490 milljónir árlega til 800 bænda en til verkefnisins "Bændur græða landið" fara um 35 milljónir króna árlega til 600 bænda um allt land.
Til að sinna brýnustu þörf fyrir nýja þátttakendur og lágmarksaukningu til þeirra sem þegar eru í verkefninu þarf a.m.k. að tvöfalda það fjármagn sem verkefnið hefur til ráðstöfunar.
4. Erindi búnaðarþingsfulltrúa á starfssvæði Bsb. Suðurlands
Búnaðarþing 2006 gerir kröfu um að Alþingi og framkvæmdavald standi við gildandi þingsályktun um fjárframlög í Landbótasjóð.
Greinargerð: Í Landgræðsluáætlun 2003-2014 er gert ráð fyrir að 90 milljónir króna komi á tímabilinu 2003-2006 og 110 milljónir komi á árabilinu 2007-2010. Aðeins hafa skilað sér 42 milljónir króna. Fyrirséð er að ef Landbótasjóður stendur ekki við skuldbindingar sínar verður um verulega aukin útgjöld að ræða hjá bændum sem ætla sér að standast kröfur um gæðastýringu samkvæmt gildandi sauðfjársamningi. |
|
|